بيير كاردان....⁦✍️⁩خالد عاطف ابو العزم

عندما يتمزقُ الجِرابُ .... يَفِرُ الحواه بيير كَاردَان ======== لِسَّه الحياه فاتحه زارير صدرها تِقدَر تشوف قلبها مشمَّره كم القميص والحواجب وواقفه وقت المغارب مورنِشَه ضحكتها لون الوِش كِسوة عسل على جمجمه من مِش تتمط ف عيونك .. وفجأه تكش مش قصدها تخدعك لكنَّها بتدَّيك مبرر للسقوط .. الغش . لا الشِعر شِعر جَرِير ولا الأَخطَل التمر هَج لشجرة الحنضل لايق عليك ياشِعر يوم فَرَحَك بَدلِة - بيير كَاردَان - على الصَندَل ، يصقَّفوا لمقامك الطاهر تتزَف زَفِة طفل متطاهر ، ويهللوا لَك كل شَم نسيم تبقى الفسيخ والرنجه والسردين ، وتبقى حقنة بنج للمجانين ، والحلوه تاخدَك .. إوعى تسأل ليه بروش على فستانها فى السواريه قادر يخلِّى القُبح يتزوَّر على صدرها على وسطها على رجلها تنوَّر !!! وتبقى سِنجَه فوق ميزان العَدل قاعد عليها المُدَّعى والندل ، شمعة سبوع مَطفيَّه فى الجنازات ، وكراويه فى البزازات تداوى مغص الروح وتغنى للمدبوح : يابختُه بالجنَّه أهو نالها واتهَّنى عقبالكوا ياسامعين يوعدوكوا بالسكاكين تدبحكوا .. ترتاحوا !!!! كان جالكوا إيه م العيشه غير الهَم ثَبَتت براءة سَفَّاكين الدَّم الدبح شرعي .. أوعى تتمنظر قبل أما يدبح كَتِّفُه وكَبّر واتوضَّى دم .. وصام .. وصلَّى عليه وف إيدُه مُصحف باش بدمع عنيه ف شَهَد لُه طوب الأرض بالتقوى . ملعون أبوه الشِعر لو مأوى لأى سجن يشدّنى لبابه تلميذ فى كُتَّابُه أستاذُه أى خسيس قلبى ماهوش فَرَسَه أركبها ورا إبليس . ______________________ ( بيير كاردان بيت أزياء فرنسى ) خالد عاطف أبو العزم