عندما تصبحُ الحياةُ حانةً .. نتقاسمُ فيها كؤوساً فارغه .
قرش أبيض .. قرش حشيش
===================
الدنيا عالَم فيه عوالِم كتير
ترقص .. تلِم النمل والدبابير
الدنيا عالَم ضَج .. واتحَزِّم !!
فَرحت حميرها ..
ونقَّطوا الخنازير .
والحفله دارت ..
غَنّت الغربان .
الفاضى .. برضو يكُب ف المليان !!
ب البلدى .. خايف .. يعنى متلجِّم
رَكَبت نعجه ..
والحقيقه حصان .
حصان بلاستيك .. ثار ف وش البشر :
مش كل حى على الجماد انتصَر
أنا غصب عنّى ... ب ابقا لعبتكم
وانتوا ب مزاجكوا .. بقيتوا حتة حَجَر !! .
أنا وانتَ راس .. ماطلعلهاش رجلين
أنا وانتَ قُفَّه .. و ح نشيلوها اتنين
مطلوب ياصاحبى .. اختار .. مابين حلمين
حلم النهايه .. وحلم غير مشروع !!
ممنوع عليَّا اللعب ف الممنوع
أمّا النَفَس .. يلزَم لُه تأشيره
مسموح أنام ف الخمرَه والبيره
والقرش الابيض .. يبقى قرش حشيش
مطلوب ياصاحبى .. أبوس إيديَّا .. واعيش
وابوس أيادي كتيره .. مااعرفهاش !!
وقَفت قصاد عينى وممدوده
وانا قُدرتى على بوسها محدودها
طول عمرى فقرى .. ما احبّش الفَتَّه
ولا احب اخُش .. والقَّح الجِتَّه
ومن الفُتَات .. ألحَق .. فُتات نايب .
واخِد شهاده .. إن انا خايب
وانَّك عبيط ..
يعنى احنا .. حَلَّه .. وغطا .
مافيش كلام ف فى قاموسنا ..
غير العَطا
ومافيش عطا غير م العروق .. الدم
ومن القلوب .. نفتح دولاب الهم
ونوزن المكسور ف أيامنا
ونغلِّفُه ب أحلامنا .. يبقى ديوان .
مين اللى قال الشعر بالمجان ؟
حبة كلام لمَّا القمر ب يهل ؟
أو إنُّه وجبة عشق بالبشاميل؟
أو إنه فَقرَه ف حفله منصوبه ؟
ف دنيا عالَم .. فيه عوالم كتير !!
يتقال .. ويبسِط شِلِّة الدبايبر !!
وصاحبه آخر ليلته .. يتعشّى !!
ويملا جيبه .. ب نُقطة الخنازير ؟
خالد عاطف أبو العزم
ليست هناك تعليقات:
إرسال تعليق