البعضُ لايشُمُ رائحةَ الوردِ إلَّا فى جِنازتهِ
تسليم بدون رَكْعَه
=============
الخط .. كوفى ..
والشعور .. رِقعَه .
الشِعر صعب ..
ووقعتُه وَقعَه .
يا يكون نَغم .. من قلب ب يصلّى
يا يكون يادوب .. تسليم .. بدون رَكْعَه
أنا مش ح اقول قلبى اتوهَم .. ولاتاه
أنا عينى عينَك مُتَّهَم بالحياه
إخترت أشوف الدنيا .. قبل ما اموت
من غير ورق جرانين .. غَطَا ..
ولا توت .
إخترت أشوف سَوءاتها ..
وانا لابس .
قناع ب يضحك .. خَلفُه شئ عابس
ساقط ف كشف الهيئه .. وقت القبول
مؤمن بإن نجاحُه مش معقول
والإمتحان منشور ف كل البلد
نتيجته طلعت .. قبل مايتولد
والكشف متعَلَّق .. ب عَرض قفاه
مولود .. ب مُلحَق - فى الحقيقه - معاه !!
توأم سيامى .. لإنه عاش قُطَّه
مهما ادَّعى إن الخضوع خِطَّه
وان العُلا .. آخر طريق الذُّل
والدنيا .. نوته من موسيقى الغِل
وان اللى ثار ع الظلم .. نغمه نشاز
واللى خَسَر ف الدنيا .. حتماً فاز
لو حتى ولّع جوّه نفسه ب جاز
ورفض يعيش الفرحَه مسروقَه
وعاش .. وهوَّ حقيقه محروقه .
الحق ف الأيام دى .. زى ابولهَب !!
كافر .. وناقص ف العَلَام .. والأدب
لكن عقابه .. ب يبقى ف الدنيا
ثوابها .. متخصص لناس تانيه :
الرقّاصين ع الحَبل .. والأراجوزات !!
والموهوبين ف صناعة الجنازات !!
توريد سريع .. للورد .. والمقتول !!
وأغانى عن كراماتُه ع الأرغول !!
وعيون ب تبكى .. وتدعى بالرحمه .
الحق واقف وحَده .. ف الزحمه
كأنه طفل يتيم .. عديم الأهل !!
مشكوك ف نَسَبُه ..
ومُتّهم بالجهل !! .
الخَط كوفى ..
وهوّا بالرقعه !! .
لو قالُه شاعر .. وقعتُه واقعه !!
ح يكون نَغَم .. من قلب بيصلّى
مفروض يكون .. تسليم .. بدون ركعه !! .
خالد عاطف أبو العزم
ليست هناك تعليقات:
إرسال تعليق