عينانِ .. حاويتانِ فارغتانِ .. للببيعِ .. أو للبدَل .
هديل البوسته
==========
فيروز ب تنده يامَه على عاليا
وتقول كتير .. ف عيونها .. والجوابات
وانا مصر عندى عاليه .. ياعاليه
ما اعرفشى ليه ب تقطّع الجوابات !!
البوسطجى ماسَلمش من ايدها
فى كل يوم يوصل لُه تهديدها
عيونها حلوه ..
إنما لسِيدها !! .
أهديها ورد ..
تحطُّه ف الجنازات !!! .
إنتى .. ف ضَيعه ..
هيّا ليه ضايعه ؟ .
معايا .. قاسيه ..
وللغريب .. مايعَه !! .
تشدُّه ليها ..
- كإنّها صايعَه - !!
أو بنت ليل فى ماخور ..
دخولُه بلاش !! .
تتعشّى يوم ..
وكتير ماتتعشاش .
فاضى الشجر ..
مافيهوش .. لاخوخ .. ولاتين
ماقدرش اقول لعيونها ( يُخرُب بَيتك )
عيونها .. وقت الصمت .. مش حلوين
والبوسته قافله ..
وخاليه م المرسيل .
ح يكون شبهها بكره نهر النيل
للبيع مساقى ..
وللإيجار صفصفاف .
وجزمَه نلطم بيها ع الأشراف
إللى العطَش جالهم .. بإيد العبيد
أنا كل يوم باناديها ف المواعيد
أنده ياعاليه ..
أيوه .. انتى يا مصر
قومى دارى صدرك .. والكتاف .. والخَصر
ح تبقى أنجَس م اللى عَرَّاكى
زمان غلبنا نقولوا محلاكى
بس النهارده مافيش لاخوخ ولاتين .
ما اقدرش اقول يا مصر( يُخرُب بَيتِك )
عيونها وقت الصمت .. مش حلوين .
خالد عاطف أبو العزم
ليست هناك تعليقات:
إرسال تعليق