العمر تشريني :
هونيك عند النبع ع مفرق الوديان
قاعد لحالي فلفش سنيني
وغربل سنين الفرح والأحزان
يمر الصبا وبالعد ينسيني
بشردة غفا ع مخدة الحسبان
تمرق صبيه العمر عشريني
بنت الغجر أو من حواري الجان
ردت الغره عن صحن صيني
زنارها المعقود ع الفستان
يضم الحبق بالطبق تكويني
ضحكت وقالت مرحبا يا فلان
رفعت التكلف بينك وبيني
لا تقول إني مضيعه العنوان
فيك مقصودي تواسيني
وفيقت طفل الصبا الغفيان
وبلش الشيطان يغويني
ودارت خوابي الخمر ع الصحيان
وأشرب وأشرب وما بترويني
قلتلها قبلك كنت سكران
سكبتي الخمر ع الجمر تكويني
ومعقول تمرق يا هوا نيسان
وتنشر ورد ع خشاب تشريني
*******
بقلم : نوفل خليل عباس
17-8-2020
ليست هناك تعليقات:
إرسال تعليق