جميلٌ أن يرتدى القبحُ ثوبَ الوقاحةِ
باب 14
=======
باب 14
مش باب أبداً
ده حاجات تانيه
تقدر بسهوله تقول .. يشبه صندوق الدنيا
كفيار .. مع أكل كلاب .. وقطط
حواديت .. أفكار .. سرقات .. وخطط
وبشر صنفين .. عاده .. ومسخوط
وحاجات لو كَلْهَا الميت .. تانى يموت
حافيين دخلوه
رَكَبوا الطيّاره
خلّونا حجاره .. ب نترصَص على الشيشه
وساعات ب نكونوا أمَاره
لوطن مفروك
ملفوف .. ف سيجاره
الناس جواه .. تحلم بالطول
وتنام .. بالعرض !!
مع ريحه ب تسطل طوب الأرض
ونقول تحيا
من غير مابنعرف مين تحيا !!
كرّاس ..
صفحاته ب تتسطّر ناحيه وناحيه .
ونشغبط فيه
على ما نقدر
يفضل فاضى !!
كل المكتوب جوّاه ماضى !!
ولا فعل مضارع جاى
أو حتى نوى !!
وكأن الناس العايشَه هوا
طالع من مَيَّه ب تتسخَّن جوَّه القِدرَه
تنفخ منطاد ..
ب يطير .. و ب يسقط .. من شَكِّة إبره !!
وبكل ما فيه من خوف ووجع
يصرخ .. أنا جَدَع
ويقضّى حياته يطير ويرقَّع ف المنطاد
الناس .. مش يامه ..
يادوب .. قصه بليده ب تتعاد .
كرهتنا حروفها ..
وصَرَخِت يامَه : كفايه ملل
ح تجيبوا لدود الأرض شلل
ولطوبها جُزام .
باب 14 يشبه ليكى تمام
من غير إحساس
- مع إنّه زحام -
متزوّوق زيّك .. لكن مش ليّا
وب يسكن كل عيون الناس
إلَّا عنيّا !!
زيك بالظبط امّا تجينى ..
واكون مش عايز
لو جايبه الدنيا ف حضنك .. مش فايز
ولا قادر ابص ف عينك حتى مجامله
وكأنى ولد متخبّى .. وعامل عَمْلَه !!
ومجرد إنى أشوفك تبقى جريمه
باب 14 زيك بالظبط .. هزيمه
وماشوفتش غيرها معاكى حاجات تانيه
ب ادخل جواكى يادوب فُرجَه
و ب اقضّى الباقى ف عمرى ..
ف صندوق الدنيا .
____________________
باب 14 : هو أشهر أبواب ميناء الإسكندريه .
الجُزام : مرض بشع يُعزَل من يمرض به فى مستعمرات ولا علاج له .
خالد عاطف أبو العزم
ليست هناك تعليقات:
إرسال تعليق