مين حرم الحب
الجرح لما يتعصر
ينزف أنين
والقلب لما ينكسر
يعزف حنين
ويرتوي القلم يسكر
ويخط كلمتين
يحدفهم في قلب الليل
وشاعرنا حاضن ربابته
داير وسط الحواري
يشعر من قلب وتره
نشيد في حب الجواري
ويقول:
مين حرم الحب
ياناس من أول الخلق
آدم عشق حوا
أعزف وقول يا شاعر
علي وترك الحساس
اكتب بصدق المشاعر
قول دا الحب قادر
يطهر قلوب الناس
مع أن بحره واعر
وموجه هادر
وان كنت شاطر
بلاش تخاطر
رد الشاطر وقال
لا مهرب من المكتوب
ضحكتله من وش الميه
حوريه
في الأصل هي جنيه
فارده شعرها ضفاير
صابره ومستنيه
يقع في شباكها شاعر
ويخطفها علي فرسة
بيضه و متحنية
ويغطس معاها في حضن
الميه
سلم لها الشاعر أمره
ما العشق خلاص أمره
يدوق معاها الكاس
ما قدر يلاقي مهرب
ولا قدر ينفد بعمره
وعاش أيامه مغلوب
ينكوي بنار جمره
بقلم
سيد جعيتم
جمهورية مصر العربية
ليست هناك تعليقات:
إرسال تعليق