_____ وطن على الحافة _____
تقرأ باللهجة البدوية
كِصيدة لاهي قِديمة
ولاهي جِديدة
وبِيها هِيج وهِيج
ومن واقع الحال
نوبة عليك ونوبة مِعاك
ومِن هَيْ الطرق تِبي تِروح
تِلْقاها
تِلَطالك وُتِلْقاك
والخلق مَاطالع ِبإيده
بعد ماصِفَت ْ عالحديدة
....
وارِيد أخَبِّركُمْ وَسولِفْكُم ......
سوالف ...
عُمِر ْ
ماطَكَّتْ مِسامِعكم !
يَوَلُّوو كل اللي يجري
وما ضَجَّت مضاجعكم
وآني
أكَضّي الليل
أَعد نْجوم
وُبِيَّ هَوَسْ
وطِير يحوم
وعفاريت تِجي وتروح
وحواديت مابيها روح
سعلاة
غيلان
جن وُجان
وُشْ بِلاها الجِنْ
بالسر ما تِكْدَر تِبوح
هُوَّ سْليمان مانْطاها أمر ؟
هِي وين كانت أَيَّام
الغَمُر
والنَّبي نوح
كِعَد يِبْجي وينوح
وُعَفراق الأهل
ماجاه الصبر
والْكُمَر ...
وِشْ دخل الْكُمَر ؟
الْكُمَر ...!
من بعد الجَزِر
تايِسَوَّى المَدّ
لازم يشد ْ
وآنِي بالكُمَر دَريان
واعرف الشمس
وُلِلْشمس فهمان
عَساكم تسمعوني عَساكم
فوك الثريا مَلْعبي
وُلِفْرِسي عالثَّرى ميدان
أرِيد أخَبِّركُمْ ؟
عن حكيكتي
آني ...
آني كِصِير لْحَدّْ الفِتر
والواحد ونص مِنِّي
مايطلع شبر
وكل عَشرة مِنّي
تا يِجُون متر
ياربيييييي ياربي
ياربي
جَمْ واحد آني بالكيلومتر
يِمْجن آني مِداين
يِمْجِِنْ آني بلاد
يِمْجِن وِطن وأسياد
لا لا لا لا
آني قِبيلة
وانْتَمي بعد
لْعَشيرة
وُمن ذاك البَطن
آني فَخذ
ومن كل ذُولَةْ
آني دُولَةْ
ومن القِبيلَة ْ
مَنْ يِخالفني الرأي
لازم أشيلة ْ
وِنْ تِحِيِطَنْ
أَوْ تِمَرَّد
من الدني وُدِّي أزيلة
وِاني لِي بالفعل
اليد الطويلة
وطُوُلي
وُطُوُلي للسِّما وَصلان
أَمِد ْ إيدي
واقطف من السما
نجمات
واطُوُل سْهيل والسُّهى
والفرقدان
تِبُوني أخَبِّركم
عن الميزان
ونجم القطب
المايثبت بْمِكان
والحزن التِوَدَّر بِيَّ
من زمان
آني لي حزن
يِختلف
وما يشبهْ الأحزان
أكثر من حزن يعقوب
والصبر عندي
فُوقَكْ ياصبر أيوب
لاجِن
صَارلي دهر
صبري قهر
ومن زِمان
أبي أخبركم
عن محنتي
وُشِنوا صار
بْحالتي
من يوم وُقعَت هالمحن
والصِّحِيح أكثرها فِتَنْ
والخلق غايرة وطايرة
وبأمرها حايرة
ماتدري
تروح يمين
تروح شمال
ومر الزِّمان
وُتْدُور المِحن
وُيُومَاً وِرا يوم
تِضِيع الناس
و يضِيع الوِطن
.........
يَوَلَوْ ماتِستَحون على ارواحكُم
يَوَلَوْ ما تِخْجَلون
ضَيَّعتَوْ الِبْلاد
وُذِبَحتَوْ وُشَرَّدتَوْ العباد
والناس هَجَّت ْ
كل واحِد بْدِيرة
والخلق اللي جُوَّا
صِفَت ْ عالحصيرة
جوع عطش
خوف ورعب
محكومون باللصوص
والعصابات وقطاع الطُرق
والرشاوي والفساد
وِالْمايِقدر على ذاك
يقدر على هاد
والناس ...
حَيْدَ حَيْد ْ
واللي يِخاف مِنْ عَمْر ْ
يِطِبْ على زيد
يايُمَّااااا يايُمَّا
تعالي شوفي
شِنُو صار بَالبْلاد !
وطني على الحافة
يخوفي عليه
من نسمة ( تِجيه ) ؟
................. ماجد المحمد ....
ليست هناك تعليقات:
إرسال تعليق