قليلٌ من البحرِ بقلم // خالد عاطف ابوالعزم

 قليلٌ من البحرِ  .. وكثيرٌ من مِلحِ الشجنِ .. كان إفطارى .. ذات جحيم  .

              فَرحَه بنت حرام 

           ============

الدنيا جومَه .. 

ب تمسح الأحلام .

وانا قلبى شَخبَط يامه ..

- ع الحيطه - .

ماعادشى فيه ف اسكندريه مبانى

حبة بَشَر .. متعرَّشين .. ب البوص 

قلبى لَبَس أحلامُه .. 

بقا بلبوص .

وكان هدف للقَنص ف الثوره 

أحلامى .. عَوره 

جريئه .. 

لكن تستحق السَتر .

وساعات لازمها البَتر 

بدون طلب ..

أو بَصم على إقرار .

ف اسكندريه .. الحلو .. طعمُه مرار 

والضحكه مركب .. 

ع الرصيف ف المينا .

مدفوع رسوم إفراج لألف هزيمه 

وفرحَه .. ما اتصرَفتش ..

داخله مزاد .

مالقيتش شارى ..

كل يوم يتعاد .

 مع تسهيلات ف البيع ..

وبرضو .. مافيش .

ف اسكندريه ..

الحياه .. بقشيش .

ونسبه ع الخدمه ف أى فاتوره 

إسكندريه .. عروس بحور .. 

مسحوره .

ب جسم قرد .. 

وفوقُه وش ملاك .

والبحر فيه شباك 

مايبانش مِنُّه غير يادوب الوش 

إسكندريه ..

إتجوزتنى ب غِش .

من غير شهود 

والعقد كان ب اليود ..

عليه آخر شوية دم .

مايتقراش ..

لكن يادوب يتشم  

إسكندريه ..

جوازَه .. فى الرئتين .

وطَليقَه جوَّه العين .

على ذِمّتك ..

لكنّها متجوّزه الأغراب .

ومفتَّحه الأبواب 

إسكندريه عديدة الازواج 

جوازه شرعى .. 

و 100 جواز متعه .

و 1000 عُرفى .. 

بدون مُقَدَم صداق .

بياعه .. 

غاويه تجارة الأخلاق .

فى الصيف ..

وقدّيسَه فى فصل الشتا .

ب تبيع سِبَح على باب أبو العباس 

وتبيع ف شهر أغسطس البيره 

وبنات يشاوروا لأى عربيه

قَوّاده ..

ووَليَّه .

مش بنت بِكر 

وأول الواقفين ف حلقة ذكر 

تخرج ..

ف ايدها إزازة الخمره 

ولمبَه حَمرَه ..

تقيد .. وماتطفّيش 

زباينها .. جيش 

ف كل يوم تولد ولاد أيتام 

وفرحه بنت حرام

مالهاش شهاده ف مكتب الصحه 

ولا ليها قيد ف بطاقة التموين

مالهاش مَحل إقامه توصل لُه 

إلّا ف كلام الشُعرا  ..

والمجانين .

_____________________

الجومه .. هى الممحاه التى يستخدمها طلاب المدارس .

ابو العباس .. مسجد وضريح لأحد أولياء الله الصالحين .