سهرة مع البدر
*****
متل البدر وجهك منور
صار يعكس نور عَ الشرفة
يمكن حقيقي يمكن مزور
يمكن اتاني هيك بالصدفة
***
غليت ركوة بن وصرت أتأمل
جمال البدر قبل ما يرحل
تمتم بكلمات فهمتها استعجل
قبل ما يخفت النور أو يطفي
***
بلحظة شرود غافلني ورحل
وبكل برود أجهز ع الأمل
اجتاز الحدود على الله اتكل
عاملني بجحود بالعلن والمخفي
***
بعدني ناطرو يطل عليي ولو مرة
لأشعل شموعاً كل صوابعي العشرة
يسمين جوري فل من كل لون زهرة
انطر وما مل ّ بلكي الولف يلفي
***
بقيت على هالحال أيام وليالي
لا رندحت موال ولا خطر ع بالي
اسهر ليالي طوال وحدي أنا وحالي
اغلي وفرّغ دلال رشفة بعد رشفة
***
وهيك حال كل هالعشّاق
بيكتبوا بيمحوا بيخزقوا أوراق
وعبر الأثير بيبعتوا أشواق
علّها توصل نار البعد تطفي
*****
بقلمي خليل صالح البدرية /٢٠٢١/٢/٢٠
ليست هناك تعليقات:
إرسال تعليق