أجل لو تعلمين
للشاعر دخيل العطيوي الثقفي
،،،،،،،،،،،،،،،،،،،،،،،،،،،
أجل لو تعلمين بما سكن في خاطري من شوق
رفعتي رآية التبجيل وأعطيتِ الغلا كُله
شعور يزورني فالليل نحوك يارفيع الذوق
يسامرني ويونس وحشتي من بين خلق الله
ويدفعني مع شقة فجر حن يبتسم بشروق
وصوت يقول حي على الفلاح الصبح ياهل الله
ومديت اليدين لخالقي يالله عساها تروق
حياة اللي سكن وسط العيون وقدرها أجله
كما أسعد حياتي ليلة البارح بطيب وذوق
تبادله الهنا في يومه التالي على حِله
قلوب تعاطفت فارواحها حتى غلبها الشوق
تعاظم قدرها حتى سكن فالقلب واحتله
هذاك اللي تمكن في يديني لين سوا طوق
على صدري موده صافيه ما تقبل الخِله
ليامنه بدا قدام عيني يشبه الغرنوق
وفاح المسك فيها فوح بنا ً من طرف دَله
وذاك المبسم اللي لو ضحك كنه وميض بروق
وكحلا مندرج بين الرموش يضيّع المله
عليها سقت نفسي مثل جمالا يسوق النوق
أدور للكلا وأثري لقيت الخير في دَلّه
متى طاحت عيوني في عيونه شوقها مرموق
هلا يامن لها طيب المقام وقدر مامله
ليست هناك تعليقات:
إرسال تعليق