قد يبدأ العرضُ بعدَ إسدالِ الستار
سوق الماضى
==========
خلّيكى ف أول قلبى
ماتنزليهوش
واذا شوفتى الموج
ماتصدقيهوش
كلها أيام .. ومسيرُه يروح
لو خَبَط الصخر ..
تلاقى جروح
واذا طَرطَش حُب .. ماتتغرّيش
دى حلاوة روح
خلّيكى ف أول قلبى ..
ماتتجاوزيش الشط
خلّيكوا كلام .. على ضهر الصفحه ..
وبينكم خَط
على وش الصفحه كلام أطفال ،
دفتر أحوال ،
ورسوم تجاعيد ،
وقلم ف الإيد
عفريت .. متجوّز كل الخلق
يولد أحلام .. لا وَجَع .. ولاطَلق
ماسَكَنشى ف أى دوايه !!
وماشافشى ربايه !!
مع أى إشاره لقلبى .. ب يتهوّر !!
حتماً يتعوّر !!
ويغرّق ورقى ............ حروف
ويزمجر .. لمّا أحس ب خوف
مايعبّرنيش !!
خلّيكى ف قلبى ..
وخلّى مابينكم .. ضلفة شيش
ممكن تتخبّى وراها ..
ف وقت مايشتى الهم
والعمر يخونّى وينزف دم
وأقول لُه استنى ..
يقول لى ياعم .
إتقَفل الباب .. وماعادشى فرار
ومالكش ف نفسك أى قرار
إيّاك تنهار
وتضخَّم لى ف أحلامك .. وتهوِّل
طول عمرك متأخَّر ..
إزاى تختم أول ؟ .
قلبك مكسور
إزَّى ورقَك راح يبقى سليم ؟
الشعر الأبيض مش إثبات إن انت حكيم
أو إنك أصلاً كنت من المواليد
خليكى ف أول قلبى ..
واياكى تروحى بعيد
أنا بعت العمر ف سوق الماضى
وباحاول أحجز .. عمر جديد .
خالد عاطف أبو العزم
ليست هناك تعليقات:
إرسال تعليق