نتوارى .. حينَ نوارى الحقيقةَ الثَرى .
حمير عنب
=========
الليل .. نهار نامت ف حِجرُه الشمس
من غير دَلَع ..
ولا طَبطَبَه .. ولا لَمس .
بالأمر نامت ..
واحنا مش نايمين .
حبة بَشَر متقسّمين .. مَوَاعين
متوزَّعين ف ولايم الساده
أطباق .. حِلَل ..
والبُن .. والفناجين .
قلعة محمد على مليانه بالمماليك
وجيوش عبيد ..
وجيوش خَدَم صعاليك .
حمير عنب .. ب تشيل وماتدوقهوش
عند الإله اللى مالوهشى شريك
إله بَشَر .. ب يموت .. ويتوَرَّث
أستاذ فى فن القتل .. ومعرَّص
مالك وحيد .. للريف .. وللبندر
والأضرحه أم المقام أخضر
والطبَّالين ..
والجيش ..
وغَزل البنات .
هوّا الوحيد ب يعيش تبات ونبات
صايع قِرارى ..
لإنُّه كان عَرَّاف .
خَلَّا الكبار .. والعُلَمَا .. والأشراف
يبوسوا إيدُه يبقى سَيّدهُم
وجابوا مصر مزوَّقَه ف ايدهُم
جاريه ل جنابُه تبقى مِلك يمين
طول عمر رزق الهُبل ع المجانين
والقلَعه باقيه .. هيّا والمماليك
ب ينطّوا وقت الدَبح م الشبابيك
ويرجعوا فى نهاية المده
ومصر تبقى وَفّت العدَّه
- وإن شالَّه حتّى تكون ماوفِّتهاش - !!
سيدها الجديد مُفتيه فتَى ب بلاش !!
إن الحدود تبقى لولى الأمر !!
طهور ..
جواز ..
ولحَد شُرب الخَمر !! .
جوازه أُجرَه .. لدوله ملّاكى !!
قال اللى قال .. ولّا اشتكى شاكى
تتأجل الشكوى ليوم الدين
تنام فى حُضنُه ..
واحنا مش نايمين .
حبّة بَشَر متقسّمين .. مواعين
متوزّعين ف ولايم الساده
أطباق .. حِلَل .
والبُن .. والفناجين .
______________________
محمد على ضابط بالفرقة الألبانية التابعة للدولة العثمانية إختاره الاشراف وكبار العلماء حاكماً لمصر عام 1805 رغم أنه كان من المفترض أن يختاروا مصرياً بعد رحيل الحملة الفرنسية فكافأهم بالنفى والتشريد والمصادرة .. كما دبر مذبحة القلعة عام 1811 التى قتل فيها من المماليك أربعمائة وسبعين مملوكاً .. ولم ينج منهم سوى رجل واحد يدعى أمين بك قفز بحصانه من فوق سور قلعة محمد على التى كانت مقراً للحكم .. واستمر حكمه حتى عام 1848 .. لم يبن مصر الحديثة كما يدَّعى البعض بل كان يبنى ملكاً شخصياً .. هو مالك كل شئ فيه .. فكان الزارع الوحيد .. والصانع الوحيد .. والتاجر الوحيد وصاحب الأرض بما ومَن عليها .. وخلفه فى الحكم ابنه إبراهيم باشا وتبعه حكام من ذات الأسرة التى يُطلَق عليها الأسرة العلوية .
خالد عاطف أبو العزم
ليست هناك تعليقات:
إرسال تعليق