عجبي عليك ياأبو البنات
سلف وقروض وبيمضي شيكات
شق هدومه من الطلبات
فى كل بنك وله بصمات
مل وتعب مالخطوبات
ليل ونهار يقولوا هات
للهدايا والعزومات
اعمل جمعيه للمفروشات
تاني يوم ورينا الصالونات
لفوا ودوروا عالمحلات
عايزين شاشة فى البوتجازات
وام العريس لها طلبات
افضل نوع مالتلاجات
فول اوتماتيك الغسالات
وام العروسة تزق البنات
حلل سيراميك وألمونيات
لازم تجيب كل الدرجات
وبلاستك ومقشات
ليل ونهار فى البيت صراعات
حاجة النيش مالمقدسات
لبس العروسة وهدايا
للسلايف والعمات
لازم نشرف البنات
وما تنساش السبوع
والصباحية للحماوات
هيروح فين وهييجي منين
كان الله فى عونك ياابو البنات
(((أسامه جديانه)))
ليست هناك تعليقات:
إرسال تعليق